'അജിത്തിനോടും ആരാധകരോടുമുള്ള സ്നേഹം'; 'വിടാമുയർച്ചി ഇഫക്ടിൽ' ഡ്രാഗൺ റിലീസ് നീട്ടി

റൊമാന്റിക് കോമഡി ജോണറിൽ ആണ് സിനിമയെത്തുന്നത്

'ഓ മൈ കടവുളേ' എന്ന റൊമാന്റിക് കോമഡി സിനിമയിലൂടെ പ്രേക്ഷക ശ്രദ്ധ നേടിയ സംവിധായകനാണ് അശ്വത് മാരിമുത്തു. അശോക് സെൽവൻ നായകനായി എത്തിയ ചിത്രം മികച്ച അഭിപ്രായങ്ങൾ നേടുകയും ബോക്സ് ഓഫീസിൽ വലിയ വിജയം സ്വന്തമാക്കുകയും ചെയ്തിരുന്നു. ഓ മൈ കടവുളേക്ക് ശേഷം അശ്വത് ഒരുക്കുന്ന സിനിമയാണ് ഡ്രാഗൺ. നടനും സംവിധായകനുമായ പ്രദീപ് രംഗനാഥൻ ആണ് സിനിമയിൽ നായകനായി എത്തുന്നത്. ഇപ്പോഴിതാ സിനിമയുടെ റിലീസ് നീട്ടിയതായുള്ള വാർത്തകളാണ് വരുന്നത്.

ഫെബ്രുവരി 14 ൽ നിന്ന് ഫെബ്രുവരി 21 ലേക്കാണ് സിനിമയുടെ റിലീസ് നീട്ടിയിരിക്കുന്നത്. അശ്വത് മാരിമുത്തു തന്നെയാണ് ഇക്കാര്യം സമൂഹ മാധ്യമങ്ങളിലൂടെ അറിയിച്ചത്. 'അജിത് സാറിനോടും അദ്ദേഹത്തിൻ്റെ ആരാധകരോടും ടീമിനോടും എല്ലാ സ്നേഹത്തോടും ബഹുമാനത്തോടും കൂടി, ഫെബ്രുവരി 21-ലേക്ക് ഞങ്ങളുടെ സിനിമയുടെ റിലീസ് നീട്ടുന്നു,' എന്ന് അദ്ദേഹം കുറിച്ചു.

റൊമാന്റിക് കോമഡി ജോണറിൽ ആണ് സിനിമയെത്തുന്നത് എന്നാണ് ഇതുവരെ വന്ന സിനിമയുടെ പ്രൊമോയിൽ നിന്ന് മനസിലാകുന്നത്. സിനിമയിലേതായി പുറത്തുവന്ന ഗാനങ്ങൾക്കെല്ലാം നല്ല റെസ്പോൺസ് ആണ് പ്രേക്ഷകരിൽ നിന്നും ലഭിച്ചത്. കയതു ലോഹർ, അനുപമ പരമേശ്വരൻ, ഗൗതം വാസുദേവ് മേനോൻ, ജോർജ് മരിയൻ, കെ എസ് രവികുമാർ തുടങ്ങിയവരാണ് സിനിമയിലെ പ്രധാന അഭിനേതാക്കൾ. വിജയ് സിനിമയായ ദി ഗോട്ടിന് ശേഷം എജിഎസ് എൻ്റർടൈയ്ൻമെൻ്റ് നിർമ്മിക്കുന്ന സിനിമയാണിത്.

Also Read:

Entertainment News
ഷൂട്ടിങ്ങിനിടെ സെറ്റിന്റെ സീലിങ് തകര്‍ന്നുവീണു; അർജുൻ കപൂറിന് പരിക്ക്

കൽപ്പാത്തി എസ് അഘോരം, കൽപ്പാത്തി എസ് ഗണേഷ്, കൽപ്പാത്തി എസ് സുരേഷ് എന്നിവരാണ് സിനിമയുടെ നിർമാതാക്കൾ. നികേത് ബൊമ്മി ഛായാഗ്രഹണം നിർവഹിക്കുന്ന സിനിമക്കായി സംഗീതമൊരുക്കുന്നത് ലിയോൺ ജെയിംസ് ആണ്. ഓ മൈ കടവുളേക്ക് ശേഷം അശ്വത് മാരിമുത്തു - ലിയോൺ ജെയിംസ് കോംബോ ഒന്നിക്കുന്ന സിനിമയാണ് ഡ്രാഗൺ. എജിഎസ് എൻ്റർടൈയ്ൻമെൻ്റ് തന്നെ നിർമിച്ച ലവ് ടുഡേ ആണ് അവസാനമായി പുറത്തിറങ്ങിയ പ്രദീപ് രംഗനാഥൻ ചിത്രം. മികച്ച അഭിപ്രായം നേടിയ സിനിമ ബോക്സ് ഓഫീസിൽ നിന്ന് 100 കോടിയിലധികം നേടിയിരുന്നു.

Content Highlights: Release of Ashwath Marimuthu’s Dragon postponed

To advertise here,contact us